"LA FLOR DEL AGUA". Bernardo Guardado Rodriguez

"LA FLOR DEL AGUA"
---------------------------

E na noche de San Juàn
ya se desfizu la danza
y dexanun de sonar
les tocates de la gaita.

La foguera, pocu a pocu,
va quedàndose sin llama
por que s'acaba la leña
y les ganes de tizala.

Nel cielu ya s'adivina
el riscar de la mañana,
y van camìn de la fonte
curiendu a la desbandada
los rapazus de la fiesta.

Van guiaus po l'asperanza
de ser cada uno d'ellos
quien corte la Flor del Agua.

Isa flor que saben todus,
poque n'aldega se fala
que vive dientru la fonte,
lo mesmo que fai la Xana
saliendu una vez al añu,
per San Juàn, de madrugada,
a trayer bienes sin tasa
al que consiga cortala.

Non se corta con tiyera
nin tampocu con navaya;
qu'l que tal cosa fixera
de fijo l'astropiaba.

Col filu de la ilusòn
se corta la Flor del Agua.

¡Ay quien consiga coyela!
¡Ay quien consiga atrapala!

Que dichosu aquel que llogre
llevar la Flor a sò casa;
y alli, con cintes de seda
regalu de la sò amada,
poder tener el orgullu
de ser sò dueñu y atala
pa que la xente la mire
colgar de la sò ventana.

Noches de San Juàn en Xunio,
noches de foguera y danza,
noches donde cada mozu
cuando la noche s'acaba,
cuerri camin de la fonte
y cuerri co l'asperanza
de poder ser el primeru
en cortar la Flor del Agua.

La Flor que que tien la vertù
de poder llibrae la casa
aquella dond'ella vive
del mal del güeyu que llanza
e nel vevir de la xente
la bruxa de mala saña.

Que cuidia de les presones;
y del ganau ena cuadra.
De les pites, de los gochus,
del horru y de la tenada;
y de que non falte'l riegu
na tierra recien semada.

De que den yerba los praus
y los pomares manzana;
y tenga siempre la moza
de por quien ser corteyada.

¡Pa tou tien en sos manes
poderes la Flor del Agua!

Por esu cuerrin los mozos
cuandu la danza s'acaba
y la foguera San Juàn,
a cachiquinus s'apaga.

Por esu cuerrin y cuerrin
al ver riscar la mañana
pel camìn que va a la fonte
de la Flor tan deseada.

Por esu cuerrin los mozus
con tal fervor y tal ansia
e na noche de San Juàn,
emburriaus po l'asperanza
de ser cada unu d'ellos
quien corte la Flor del Agua.

B.G.R. (Cantando a Asturias)